كل سنه وأنتوا طيبين
النهارده الوقفه
والكلام اللي "" واقف "" ف زوري حقوله بقى
حلفت مش حتكلم خالص ع الماتش المنحوس هنا
وطبعاً بقالي أسبوع عماله أشير ف فديوهات - وأنزل ف أغاني محايده - وأنشر دعاوي خير - وعامله فيها شيخه وأقول أصلاح ذات البين
الهوجه خفت شويه ؟؟؟ طيب أتكلم بقى
من غير قلة أدب ... كسرنالهم الأتوبيس ولا لاء؟؟؟
كسرناه
وهما صوروه
وألعيال السيس اللي كسروه صوروه أهو
مش عيب علينا بقى وعيب على حكومة " أم الدنيا " أننا نقول هما اللي بطحوا نفسهم ؟ وكمان نخلي السواق يشهد معانا ؟
طيب لو حصل معانا أحنا كده كنا حنعمل أحنا أيه ؟؟ حنعديها بقلبنا الأبيض إللي زي الورد ؟؟
وبعدين أتغلبوا ... ياعني أتبطحوا مرتين.
رجعوا بلادهم مغلوبين مبطوحين .. ودول الجزااااااااااااااير .. دول لما بيفرحوا بيقتلوا ف بعض
لاء بقى وأيه ... الإعلام عندنا مش متوصي
بقى يا حوَش …..أغاني النصر - أغاني أكتوبر والشهدا - تتغنى عشان ماتش كورة ؟؟
جتكوا خيبه - جتكوا خيبه - جتكوا خيبه - جتكوا خيبه
روحنا السودان - من غير زعل بقى ولا قلة أدب - كان ماتش زباله لا لعبنا ولا هببنا
أتغلبنا
مش عارفه ما أذعناش أغاني النكسه ليه ؟
وبعديـــــــــــــــــــــــــــــــيـــــــــــــــــــــــــن ؟؟؟
ما أحنا قولنا أنهم أصلاً أصلاً بلطجيه
بعتنا أحنا مشجعينا الفنانين - وهما بعتوا البلطجيه - أحنا الأتنين غلطانين
على رأي اللي قالوا - هما شوية الممثلين اللي على المعاش دول هما اللي حيشجعوا المنتخب ؟؟
دول كانوا رايحين يعيطوا ويندبوا - زي ما يكون الحزب الوطني باعتهم أضحية العيد
المهم
اللي بعد السودان بقى هو العز كله
يالهوي
ضربونا هناك
الساعه 12 بليل الدنيا قامت وما قعدتش- أصحى من النوم على محمد فؤاد بيعيط ع اللفلفون هو وهيثم شاكر- والبرامج ما نامتش لغاية الصبح - ما صدقوا - والله بالظبط جنازة وشبعوا فيها لطم - الأرواجوز عمر اديب بقرعته اللي هي أكبر دليل على فضى دماغه - عمل أحلى شغل -فتنه بكل المعنى للكلمه - غندور باشا - مدحت شلبي - شوبير - طبعا ً القرد الصغير معتز بتاع 90 دقيقه - ونفس القناة ف برنامج 48 ساعه - وكله كوم وتامر ف البيت بيتك كوم تاني - مسسسسسسسسسسسسسسسسسسسسسسسسسسخره
منتهى قلة الأدب
شتيمه على الهوا - صور متفبركه - فضااااااااااااااايح ع الفضائيات
الناس الدول ما بيفكروش فيما كتبت أقلامهم ؟؟
مش عارفين أنهم بيسخنوا شعبين على بعض وبيعملوا مصايب
علاء مبارك
بقى علااااااااااااااااااااااااااااااااااء مباااااااااااااااااااااااااااااااااارك يتصل بالبرامج يعيط زي العيال الصغيرة
الناس قالوا أصلهم بيمهدوا لعموا جمال - وعايزين الناس تحس أنهم مننا وعلينا
وفكرة تانيه بتقول أصله وقع مع أخوا بوتافليقه ف صفقه بمليارات
بصراحه
أفهم السبب التاني وأتقبله ألف مرة عن الأول
أصل لما البزنس يسيس الكروة والرياضه - بسييييييييطه - فاهمة أنا أن كل الناس قلبها ف جيبها - مابلكم بعلاء بقى وأحنا متربين على أنه شريكنا ف كل لقمه .
لكن أبن رئيس الجمهورية - يطلع يعيط عشان عايز حد يحميه ؟؟
ياااااااااالهوي
وأحنا مين يحمينا - مين يقولنا حنعمل ايه
بقى أبن الريس يطلع يعيط ف البرامج - وتامر حسني يطلع يقول بلغني أن الرئيس مبارك متابع بنفسه الأحداث
ألطم ؟؟ لاء بجد حلطم
طيب
حسكت
حتبط
الدنيا قامت - والفيفا قالت أننا أحنا اللي غلطنا - ببساطه - الأتوبيس متصور وهو بيضرب عندنا - ما فيش صورة لمشجع مصري بيضرب بشكل واضح ف السودان
غير أن كل الماتشات ف العالم بيحصل فيها شغب بعد المباراة
لكن ما فيش ناس ترتب حملات زار تحت فندق اللعيبه - وتكسرلهم الأتوبيس
ودلوقتي عايزين نجمع نص مليون توقيع عشان نطلع الجزاير من المونديال
تااااااااااني - جتكوا خيبه - جتكوا خيبه - جتكوا خيبه
والله قرفت وأنا بكتب
أفففففففففففففففففففففففففففففف
بقى ياعني ده اللي فلحنا ف أننا نتجمع فيه
ده أحنا ما أجمعناش كده على أسرائيل ف مجازر غزة اللي كانت ف نفس وقت الماتش
الخلااااااااااااصه عشان عايزه أقوم
لو أمك أتخانقت مع مرات عمك
دي غلطت ف دي ودي غلطت ف دي
حتفضل طالع داخل تسخن بينهم ؟؟ تلم أخواتك وتطلع تقتل مرات عمك وولادها
ولا نلم الموضوع بقى ونقول نفتكرلها حاجه حلوة ؟؟؟
مش نتلم بقى !! مش نفتكر لبعض حاجه حلوة
هو أحنا ناقصين هم
جروبات عشان سحب السفير - جروبات عشان سحب المصرين اللي ف الجزاير - جروبات عشان الجزاير ما تدخلش المونديال
الظريف بقى جروبات عشان نسحب العروبه من الجزاير !!! زدي تتعمل ازاي يا خويا ؟؟؟
طيب ونبي خليهم يسحبوا بتاعتي انا كمان عشان الواحد مش ناقص هم
الظريف اللي بحق ربنا - اللي عجبني بجد ولاقيتها فكرة جامده موت طحن جداً - حزف الجزاير من لعبة بنك الحظ هيهيهيهيهيهي
جااااااامده .... صح ؟
العيد جه
نتلم بقى ونعيد على بعض
الحديث بيقول إلا المتشاحنين
أنا مش زعلانه من حد خالص
ومسامحه الناس كلها
وبدعي ربنا يهدي ويتقبل من الناس كلها
الناس اللي مش لاقيه ف حياتها مكان تنفس فيه الغضب غير ماتشات الكورة
عايز تغضب .... أعرف عدوك الحقيقي
أغضب بجد
وكل سنه وأنتوا كدة - مش كفايه بقى ؟
