مش حكتبلك كلام يفضل كلام
ولا هرص ف حروف وأملى سطور
حيلف الزمن ويدور .. وتفضل سطور
أحنا إللي بينا ... أنا إللي مني .....
كان فيه حاجه
راحت وخلاص
مش حبكي عليها
أصلي أنا فكيت الرهن بتاعها بإدي
وبعتها من غير ما أفكر .. بعد ما ضعيت عمري تفكير
هربت صوابعي من الأحلام جواك
طلعتها بدمك
ومسحتها ف ملامح وش كان برئ
وحلمت تغسله دموعي
رميت حب كبير عالي
عشان حلم كبير عالي
ولسه بشب وبحاول
بس بقع عشان بشب مغمضه
معميا عنيا عن اللي فوق
مليانه بتراب رجليا
كان حلم أني أكون هنا
أو هنا ده يكون ليا أنا
لا أنا قدرت أحدد الحلم عشان أوصله
ولا الحلم عمل اللي عليه وسهلي السكه
العيب عليا
عشان من الأول العيب فيك
العيب عليا
عشان عشت عمر أداري عليك
دلوقتي اللي راح بيتضاعف
ومش راجع
ولو حموت من الشوق عليك
ومش حموت من شوق ولا حاجه
ما أنا قولت أني حسبتها
ولا قيتها مش جايبه همها
مش حملها
أنا قلبي مش حملها
أنا ظهري مش حملها
حكمل كده
حكمل من غير ما أملى السطور كلام
ولا مسودات كشاكيلي
خلاص
قسمت الأحلام نصين
قسمت الكشكول نصين
قسمت الكون بين أتنين
أنا .. وانا
طب أحطك فييييييييين؟؟؟؟؟
