حافظ ...... يا قلبي
ـــــــــــــــــــــــــــــــــــــــــــــــــــــ
وأقوله نسيت - نسيت رسمه
طردت روحه برا البيت
ما بقيتش أحلم بعيونه
نسيت ريحته - ونفسه الدافي
تبت أنا عنه خلاص وإرتحت
يا قلبي خلاص - أنساه وأرتاح
بلاش الذنب اللي واجعك
عاشق واجعك!!!!
خلاص أنساه - ونام مرة ف حضن جديد
يقوم قلبي يزيد وجعي
ويرد بهدوئه المميت
معاه بحس النبض فيا بيبقى .. نبض
ولو خرجت أنفاسي مني
ماعدتش ِ
حكون ف غرامه أنا غرقان
وليه حافظ
ليه بس بتعاند معايا
حتيجي عليا يا قلبي كمان
والله خايفه على وجعك
على سهرك
على دموعك ف نص الليل
وصرخاتك
سمعاك يا قلبي وعارفه ايه بقى حالك
كفياك أوهام
تاعبني تعبك
وعشانك أنا بهرب
ما تيجي معايا خلينا نسيب الحلم
ووعد يا قلبي ما حسيبك تفكر فيه
ولا ترمي ما بين درعاته دقاتك
ولا تفضل طول ليلك تنادي عليه
ومين سمعك
بترجعلي بنفس الحسرة على وشك
وتوجعني على وجعي
كفايا عليا أوجاعي
طيب - جرب
نشوف دفا من غير أنفاسه وجمالها
نشوف أيام بعيد عنه
ما تيجي نجرب لو نهرب لنورعادي
وننسا يا قلبي ضي عنيه
وماله .... تعالى نجرب إيه تاني !!!
نجرب ننسى أسمه كمان
وأهو نرتاح من الدوخه - ووج القلب - و القبضه
ف كل مرة نسمع فيها أسمه أو حتى بنشبه عليه
وإيه يجرى
كمان ننسى كلامه اللي دوبنا فيه لسنين
وإيه ياعني
كمان ننسى ننادي عليه
بقالك يا ما بتنادي - طلعت بإيه ؟؟
وبالمرة كمان ننسى أنه خلانا
نحس بأني ف الحياة
إنسا الفرح
إنسا أن نور عيونك يبان تاني
حنسى أني معاه بحلم كأني لبكرة قادرة أعيش
وشوفت الدنيا اللي من قبله ما شافتنيش
وحنسى معاه كمان أحبابي
ما هو ف كل الحواليا أنا بلاقيه
..... كمان حنسى أيه تاني ؟؟؟
ده أنا لو روحي راحت - ونسيتها
ساعتها
حفكر أني أنساه
خلاص يا قلبي
خليك كده وزي ما تكون
خليك لعيونه عايش مرهون
وخلينا عشانه نكون
ومهما يكون - تكون حافظ
جنان محمود
