لما أصحى من النوم ف السرير نص ساعه قبل ما أقدر أقوم منه
يبقى الشتا هل
لما أكوم الروايات والكتب ع الكمود جنب السرير - وأنور الأبجوره بنور أصفر وأدخل السرير من 9 بليل
يبقى الشتا هل
الكاكاو... آآآآآآآآآآآآآآآآآه من الكاكاو - المج المفضل - والحليب السخن بالشكولاته
يااااااااااااااااااااااااه - منتهى المتعة - كوبايه كل ساعة - وبليل بقى بحس أني محتاجه جركن كاكاو جنبي ع السرير
لما أشتري 3 علب كاكاو ف الأسبوع
يبقى الشتا هل
لما أكون هشه كدة وحاسة أني عاملة زي الجلد الملسوع مش طايقه حد يجي ناحيتي .... يبقى الشتا هل .
لما أقل حاجة تقبض القلب - و بدون سبب أكون عايزة أعيط - ويكون عندي حنين لشئ مجهول بس واحشني أوي
يبقى الشتا هل
لما ريحة الجو ف الصبح تداعب في ذاكرتك حاجة ... حاجة تنط لفوق بس ما تقدرش تظهر ع السطح بوضوح
ده مش بيحصل غير ف نهار الشتا
الشتا بدأ يهل
وزي ما الإعلان بيقول - بحب ف الشتا ......... شياكته
وكل شتا وأنتو مشكلتين :)
